Cycling for freedom جولة الحرية

الخميس 23/3/2017 الساعة 7:00ص

جولة الحرية القدس-عمان-العقبة على الدراجات الهوائية.
الناس بتحكي عنا انتوا مجانين ولساتكم صغار شو هاظ الي بتعملوا فيه راكبين بسكليت بدكمش تكبروا اذا البسكليت للصغار بس خلينا اصغار ونضل عايشين طفولتنا وننبسط مع البسكليت بس مش عارفين قديش اهميتوا من رياضة وطشات ومنو بنتعرف على فلسطين اكثر ورحلاتنا بنعملها كل يوم جمعة وعلى منطقة جديدة في البلد واسمنا على وسائل التواصل الاجتماعي فلسطين ع البسكليت الي بحب يشاركنا اهلا وسهلا فيه بنقطع في هاي الرحل من 25كم - 50كم باليوم، وفي رحلة فريدة من نوعها قررنا نطلع من القدس لعمان للعقبة على البسكليت ونقطع 440كم، طبعا ناس كثير حكولنا مش رح تقدروا تكملوا وتعملوها بس احنا عنا هدف وحلم وبدنا نحققوا وهو نرفع اسم فلسطين ونشجع الناس على ركوب البسكليتات ونقطع مسافة طويلة بدون حاجز او طريق مغلقة تعيق حرية التنقل في فلسطين وسمينا جولتنا "جولة الحرية"، بدينا نسعى ورا الموضوع وتوجهنا لشركات خاصة وكانوا يتهربوا توجهنا للمؤسسات الحكومية حاولوا يتهربوا ويطلعوا حجج وبالاخر حكولنا "انتو طالعين شمة هوا" مشكورين كثير بس ارادتنا اقوى منكم كلكم ورح نطلع لنرفع اسم فلسطين وندعي لحرية الحركة في كل دول العالم مش بس الاردن واذا هالشي بكلفنا ندفع من جيبتنا رح ندفع مثل جولة الاردن دفعنا من جيبتنا والكل رفض يدعمنا.

تدربنا على الجولة من شهر بموضوع الاسعاف والتخييم وكل اشي بنحتاجوا بالجولة، حسب الخطة الي حطيناها الانطلاقة اتكون من القدس ولكن الاحتلال برفض يدخلنا على القدس قررنا ننطلق من حاجز قلنديا الي هو اقرب نقطة على القدس.

اليوم الاول القدس:يوم الانطلاق تجمعنا على حاجز قلنديا صبيتين "ملاك وبيسان" و 8 شباب "صهيب فؤاد قصي عماد عبدالله محمد احمد اسلام" الساعة 7:30ص كنا على الحاجز، كان الاعلام موجود وعمل مقابلات وبعديها تحركنا لاريحا وبالطريق رن اكثر من راديو وعملوا مقابلات وبس وصلنا الغور وقفنا ودبكنا شوي طبعا الكل كان مبسوط وطاير من الفرح بس لانا طالعين نمثل فلسطين وايمانهم بضرورة حرية الحركة للشعب الفلسطيني وايصال رسالتهم للعالم.

بس وصلنا اريحا فؤاد عمل حادث مع سيارة حكومية والحمد لله كانت سليمة الضربة واجت الشرطة وحلوها الشباب وطلع البطل.

وصلنا الاستراحة ومن هناك شحنا البسكليتات للاردن لانو ممنوع ندخل على البسكليتات من لحدود بسبب الاحتلال وكان احد العوائق الثاني الي واجهناه بطريقنا بعد القدس.

اليوم الاول عمان:

الساعة 4:00م وصلنا الاردن وهناك سجلوا اسماء البسكليتات عشان بالرجعة ما يجمركونا عليهم وتساعدنا كمان داخل الاردن، ركبنا البسكليتات وتحركنا لعمان لنخييم لليوم الثاني.

طبعا الناس يسالونا من وين انتو نحكيلهم جينا من القدس ونازلين على البسكليتات ويفرحوا فينا طبعا هالشي كان يعطيني فرح وانبساط كثير لنكمل الجولة لانو صار ناس جديدة تعرف عنا وصارت اتابعنا بالجولة وشعور حلو تحكي عن الاشي الي بتعملوا والحلم الي بدك توصلوا، اطلقنا هاشتاغ #cyclingforfreedom او #جولة_الحرية " ونحكيلهم تابعونا على الهاشتاغ وفعلا تابعونا ناس كثير.

وصلنا عمان كانت الساعة تقريبا بعد ال8 لفينا بعمان شوي لوصلنا الدوار الاول وهناك تعشينا.

بدنا نخيم ونام للصبح ونتحرك الصبح دورنا على مكان وكان في على الدوار الاول حديقة عامة خيمنا فيها كانت الساعة بعد 12 بالليل نام جزء وجزء ضل صاحي واجت الشرطة بعد نص ساعة حكولنا ممنوع تخيموا هون اطلعوا وخيموا على طريق المطار هناك امان الكم اكثر وفعلا ضبينا الخييم واتحركنا على طريق المطار الي بتبعد عنا 20كم وباقل من ساعة كنا قاطعينهم على البسكليت طبعا الجو كان عبارة عن ثلاجة وصلنا لمكان وخيمنا فيه طبعا كل الشكر للاشخاص المجهولين الي ساعدونا بهاي الليلة ووفرولنا المكان والحماية من بعيد، خيمنا الساعة 1:30 تقريبا ونامو الشباب والصبايا وكان الجو فريزر والمهمه على اسلام وفؤاد بالحراسة طبعا ما صدقنا وهمة يناموا ونمنا انا "اسلام" كل نص ساعة كنت اصحى اذا في حد او صاير شي وارجع انام وفكرت مره بس اصحيت اطلع من السيارة والف شوي حولين الخييم ويا ريتني ما طلعت فرزت من السقعه رجعت على السيارة بسرعه .

اليوم الثاني الطريق الصحراوي:
صحينا على ال8 والجو لساتو الجو بارد ضبينا الخييم وعدة النوم وجهزنا حالنا وانطلقنا بعد ما اخذنا صورة جماعية وضحكنا شوي.

على الطريق وقفت سيارة ونزل منها اربع شباب فكرناهم ناس بدهم يعملوا مشكلة وبعد ما حكوا معنا طلعوا من قرايب مراد الي هو احد مؤسسي فريق فلسطين ع البسكليت وللاسف ما كان موجود معنا، المهم طلعوا الشباب عازمينا على فطور واخذونا على مطعم افطرنا وارتحنا شوي وبعديها كملنا للعقبة الي بتبعد عنا 320كم ومن عمان للعقبة ضلهم على تواصل معنا.

افطرنا وكملنا طريقنا وبلشنا نبعد عن المناطق السكنية وندخل اجواء الصحرى والشمس القوية والجفاف الموجود والطريق صارت اخطر بسبب الشاحنات الموجودة ع الطريق.

بعد 10كم تقريبا كان اول بنشر مع احمد غير بنشر وكمل.

الاستراحة الثانية كانت جانب الطريق بعد 30كم كان موجود راعي اغنام وقفنا عنده وتريحنا وبعديها كملنا.

مشينا تقريبا 30كم واحمد عمل حادث كانت اصابتوا شوية رضوض اسعفناه وطلع بالسيارة ما قدر يكمل هاليوم بالسيارة كان ضايللنا 20كم لاقرب نقطة للتخييم.

وصلنا محطة المناصير للمحروقات وهناك طلبنا من صاحب المحطة نخييم بمكان امن واعطانا مكان وخيمنا فيه اتصل علينا قريب مراد وحكالنا ما تشتروا اكل جايبيين اكل معنا وهينا جايين عليكم "كلمات الشكر لاتوفيكم حقكم" سهرنا معهم وغنينا وبعديها من التعب الاغلب نام غلطوا نفس الغلط وحكولنا فؤاد واسلام احرسونا طبعا ضليت صاحي وبعديها نمت وكنت هالمره كل ساعه اصحى والجو عبارة عن فريزر والي بيعرف سقعة الصحرى بالليل بيعرف المعاناة برحلتنا.

اليوم الثالث الطريق الصحراوي:
الساعة 5:00ص وحسب الخطة نصحى كلنا ونجهز حالنا صحيت ثاني واحد كانت ملاك صاحية ومش راضية تطلع من الخيمة عشان السقة ونبهت الكل وكلهم صحيوا طبعا نايمين بجانب شارع عام وبربط عمان بالعقبة وداخل محطة بترول والشاحنات رايحة جاي هون كانت النهفة الحلوه المشاركين صاروا يعرفوا نوع الشاحنة من صوتها او من الزمور او من نوع عجل الشاحنة، ضبينا الخييم وعدة النوم ونضفنا المكان اللي نمنا فيه وتحركنا كانت الساعة تقريبا 7 الصبح بنبعد عن العقبة 240كم.

في لوحة مكتوب عليها السعودية اليمن \|/ تصورنا عندها وكملنا.

الساعة 9:00ص وقفنا عند استراحة لنفطر دخلنا عليها طلع اسعارها خيالية طلعنا وجبنا فطور وقعدنا على باب مسجد وافطرنا، الجو كان عبارة عن فرن ارتحنا شوي واتحركنا.

وصلنا استراحة القدس على الطريق الصحراوي وهناك كان في اجانب واخذوا يتصوروا معنا ارتحنا هناك نص ساعة وبعديها تحركنا.

عماد عبدالله احمد ومحمد كانوا سابقينا وواقفين عند شحن كان خربان على الطريق ومن الجوع اكلوا كل الاكل الي مع الزلمة.

على الاستراحات التقينا بناس كثير والكل كان يشجعنا على جولتنا طبعا هالشي كان يعطينا قوة لنكمل للنهاية هاظ غير الي كانوا يبعثولنا رسائل ويشجعونا من الاردن وفلسطين، وفي ناس كثير عزمونا على الغدا او للمبيت عندهم شكرا لكل شخص قدملنا المساعدة بجولتنا.

بيسان بنشرت في الطريق وكنت معها وقفنا تقريبا ثلث ساعة نستنى السيارة لتيجي ونغير بنشر وكانت السيارة موجودة مع فؤاد قبل يوصل فؤاد وقفت سيارة وحكالنا اطلعوا لاوصلكم لاقرب نقطة بتستريحوا فيها وبتعملوا بنشر هناك بضل اهون ما نضل قاعدين تحت الشمس وفش مكان نقعد تحتي طلعنا معوا مسافة تقريبا كيلو ونزلنا في استراحة وبس عرف من وين جايين عزمنا عندوا على الغدا اعتذرنا لانو فعلا ما بنقدر، وصلت السيارة وعملنا بنشر وكانوا متاخرين لانو قصي عمل بنشرين بالطريق استنيناهم لوصلوا وبعديها تحركنا.

هاظ اليوم كان من اصعب الايام الي مرت برحلتنا واول مره بنمشي بالليل وبنقطع مسافة 140كم في اليوم، هون كانت ملاك تعبت كثير وما رضيت تركب مع فؤاد بالسيارة واصرت انها تكمل على البسكليت للنهاية بدون ما تركب بالسيارة.

وصلنا مشارف معان وبدنا مكان نوكل فيه ونرتاح لثاني يوم سالنا عن مطاعم وخبرونا وين في مطعم "مطعم حضرموت للماكولات اليمنية" رحنا عليه وشفنا ايش في عندوا اكل وطلبنا وسالنا من وين جايين وبلش الحكي يجر بحكي كان في شب واقف حكالنا شفتكم على التلفزيون تكون ماشي بطريق والناس عارفة عنك او سامعتك بكون اشي عظيم انبسطنا كثير من هالخبر، طلعنا على الطابق الثاني وكان في فراش عربي بالمطعم كل واحد اخذ زاوية ليرتاح قبل ما يجي الاكل وبس وصل الاكل الواحد من التعب مش قادر يتحرك اكلنا ونزل صهيب يحاسب حكالوا صاحب المطعم حسابك واصل حكالو مين الي دفع حكالوا حسابك واصل اتناقروا وما رضي يوخذ حكالنا انتو جايين من القدس وبدكم اوخذ منكم ومش هيك كمان بس عرف انو رح نخييم بمكان حكالنا بدكم تخيموا وبيتي موجود واخذنا على بيتوا ونيمنا عندوا في البيت احنا بنحكي عن "عشيرة الكراشين ابو عادل ابو ضهير المحترم الكلام ما بوفيكم حقكم".

اليوم الرابع معان:
الساعة 6:00ص نايمين وبدنا انضل نايمين كمان ساعة اذا بصحلنا بس صحونا الشباب لنتحرك كانوا محضرين الشاي ولفطور ضبينا الغرفة الي نمنا فيها وافطرنا وطلعنا اتصورنا مع صاحب البيت وبعديها كملنا، طبعا طول الطريق وعلم فلسطين يرفرف على البسكليتات والسيارة.

كان ضايللنا 140كم عن العقبة، في الطريق طلبوا مني اروح اجيب فطور وارجع كانت اقرب استراحة بتبعد مسافة 17كم وكنا قاطعين 15 كم بدون استراحات نصبنا خيمة جنب الطريق وافطرنا فيها وارتحنا وبعديها كملنا قطعنا 25كم من الصبح كانت الطريق طلعات ونزلات كنا نحس انو الطلوع اسهل من النزل وفي نزلة صهيب بقول والله لنتشيف اليوم وفعلا ما خلص الجملة الا وهو متشيف لحالو ووقع عن البسكليت طبعا الاصابة كانت شوية رضوض خفيفة ملاك كانت ميخذه اسعاف اولي وبس وقع صهيب بلشت تعملوا انعاش قلب ورئتين بحكيلها صهيب لسه ممتش شو بتعملي حكتلو هيك اتعلمت وبدي اعمل اي اشي، المهم اعملنا الازم وركب بسكليت وكملوا الطريق وفش 3 كم الا حادث بين سيارتين قدامنا والحمد لله ما صار اشي لحاد والكل طلع بخير وسالم.

وصلنا نزول النقب والمنظر اشي خرافي وبجنن شفنا مناظر الجبال واتغير علينا المنظر الي شفناه من يومين هو نفسو وما اتغير منظر الصحرا وقفنا باول النزول الي كان 10كم وبلشنا نصور في المنظر ونوخذ في صور صهيب وفؤاد وعبد الله كانوا مسفحين ومكييفن على النزول والباقي وقف يشوف المنظر واحلى اشي طول الطريق الشاحنات والسيارات الي بتعدي عنا بتبلش تزمر مش عارفين همه مبسوطين والي شو، كملنا النزول و صهيب وفؤاد عبدالله بيستنوا فينا بنص النزول وقفنا عندهم ورجعنا اخذنا صور وغنينا وارتحنا كان ضايللنا 70كم لنوصل العقبة كملنا بعد نص ساعه استراحة وكان ضايل 8 كم نزول المنظر وانت ماشي بين الجبال الي كلها صخر اشي خرافي وبجنن ومع صوت الشاحنات الي طايرة فالوضع لوز.

وصلنا اخر استراحة وضايل 40كم والساعة بعد ال4:30م والشمس بلشت تغيب واليوم المفروض نوصل بلشنا نتعب باخر 40كم يعني قطعنا 400كم بالاربع ايام مش مستعجلين بنخيم كمان يوم فش ورانا اشي بس في ناس بتستنى فينا وبتشجعنا انكمل وبتستنى فينا بالعقبة لنوصل.

بالاستراحة الاخيرة رن التلفون الو مرحبا احكي لصهيب عشاكم الليلة بالعقبة عنا طلعوا قرايب صهيب واسلام بستنوا فينا بالعقبة ومحضرينلنا عشا اتشجعنا لنكمل ونوصل اليوم، حتى اذا وصلنا بنص الليل بدنا نكمل وفعلا كملنا وبالطريق بنشر معنا عبدالله وبعديها بنشر فؤاد باخر 35كم حملوا البسكليتات على السيارة لوصلنا الجمارك الاردنية اول العقبة اخذوا جوازاتنا اجراءات عادية مع اي واحد، حكالنا الضابط احنا بنستنى فيكم وبلغونا انكم جايين طبعا انبسطنا وكيفنا على هالخبر وواحد حكالنا شفتكم وانتو جايين بس تسمع هيك شعور بتنبسط وبتكيف وبمعان في شب حكالنا شفتكم على التلفزيون وكثير ناس حكولنا سمعنا عنكم وبس تكون ماشي بالطريق ويحكيلك حدا شفناكم على التلفزيون او سمعنا عنكم اكيد بكون شعور بجنن هاظ غير الناس الي كانت توخذ صور جماعية معنا بالاستراحات والشباب الي كانوا يدعمونا من فلسطين والاردن كل الشكر الهم.

بعد ما اخذوا الاجراءات الجمارك عملنا بنشر للبسكليتات كانت الساعة 8:00م بالزبط يعني كنا ماشين ساعة ونص بالليل وقاطعين 115كم من معان وهاظ اليوم الاخير النا بالرحلة وضايللنا 25كم لنوصل العقبة طبعا بعد الجمارك رجعت القوة والطاقة بزيادة للشباب وكانوا يوم جديد نسيوا شو يعني التعب طلعنا من عند الجمارك والشباب متحمسة لتوصل العقبة اول ما بلشنا نشوف العقبة بلشوا يسرعوا وطايرين من الفرح لانهم حققوا حلمهم وهدفهم بالوصول، وكان علم فلسطين يرفرف بالاول والشباب والصبايا ورا العلم ماشين لوصلنا دوار الماكدونالز وكانت الساعة 9:00م، كان الصحفيين موجودين ويستنوا فينا والناس كانوا مبسوطين بس شافونا وبلشوا يوخذوا صور معنا.

طبعا هون ملاك قطعت 445كم بدون راحة وبدون ما تطلع بالسيارة واثبتت للعالم انو كل بنت بتقدر تحقق حلمها بالارادة القوية كونو مثل ملاك.

وبعدين رحنا لنوكل عند الجماعة الي عزمونا وبصراحة ميتين جوع اكلنا ونمنا كنا طبعا مكسرين ومش قادرين نتحرك بس فرحتنا بالوصل للعقبة وتحقيق هدفنا كان اروع اشي وشعور حلو بالفرحة والنصر.

اليوم الخامس العقبة:

مخططين لرحلة غوص وفعلا رحنا وغصنا في البحر الاحمر وكان اشي بجنن طبعا هون الشباب قطعت 18كم على البسكليت لوصلنا المكان الي رح نغوص فيه كانوا الشباب يستنوا فينا جهزونا وبعديها نزلنا تحت المي برحلة خرافية ثانية زي الي بنشوفوا بالتلفزيون شفناه بعينينا ورفعنا علم فلسطين في البحر الاحمر ورح نرفع علم فلسطين في كل مكان وهيك بكونوا الشباب قطعوا مش 445كم برحلتهم بتزيدوا عليهم كمان 36كم بالعقبة يعني قطعنا 481كم قطعناهم بالثلث بخمس ايام.

اليوم لسادس العقبة:
الاستعداد للعودة الى الوطن جبنا سيارة وحملنا فيهم البسكليتات واشي ركب بالسيارة واشي مع البسكليتات وهيك بنكون خلصنا جولتنا على البسكليت بس ما انتهت.

الطريق من العقبة الى عمان الطريق طويلة بس بكل متر في النا ذكريات مع الشارع مع الجبال مع الصحرى مع الحديد الموجود مع كل اشي موجود بالطريق النا ذكريات وكنا نتذكر كل اشي بالطريق وشو هون صار طبعا هاظ اشي والطريق الطويلة اشي ثاني ومش مصدقين انو احنا من هون جينا على البسكليت وقطعنا هيك مسافة.

وصلنا جسر الملك حسين ودخلنا وهون بنشكرهم على المساعدة اطلعنا في الباصات ولعند اليهود وهناك دخلونا على قسم VIP مش عشانا عشان البسكليتات يقدرو يفحصوهم بعد الفحص بدنا ننقل البسكليتات للنقطة الفلسطينية التنقل بين الحدود ماساة كبيرة 3 نقاط تفتيش و3 معابر حدودية بس بين دولتين وصلنا المنطقة الفلسطينية وهناك كان اصحابنا بيستنونا واستقبلونا شكرا الكم وشكرا لك انسان دعمنا وشجعنا لنكمل بجولتنا جولة الحرية.

وصلنا اريحا بعد 9:00م